მომხმარებლის გზამკვლევი

ყველაფერი, რაც ჭკუის კოლოფით სარგებლობისთვის გჭირდება — პირველი შეკითხვიდან კაბინეტის სრულ შესაძლებლობებამდე.

სწრაფი დაწყება

1. გახსენი chkuiskolopi.ge — პლატფორმა პირდაპირ ბრაუზერში მუშაობს, მაღაზიიდან არაფრის ჩამოტვირთვა არ გჭირდება. თუ გინდა, რომ ჩვეულებრივი აპლიკაციასავით, ბრაუზერის ჩარჩოს გარეშე იხსნებოდეს — მენიუს განყოფილებაში „მეტი“ აირჩიე „აპლიკაციად დაყენება“. iPhone-ზე: Safari-ს „გაზიარების“ ღილაკი → „Add to Home Screen“.
2. მთავარ ეკრანზე („საწყისი“) ექსპერტების ბარათები გხვდება — აირჩიე, ვისთან ისაუბრებ, და საუბარი მაშინვე დაიწყება.
3. ეკრანის ზედა კუთხეში ერთადერთი ღილაკია — მენიუ (ორი ხაზი). ყველაფერი მასშია: საწყისი, კაბინეტი (მასში მემატიანეც — საუბრების ისტორია — და დოკუმენტებიც), „მხარდაჭერა“ (ოპერატორი, ხელოსანი, „დაძაბვა“), „საზოგადოება“ (ფორუმი, ჯგუფები, ზეგონის სტარტაპები, სიახლეები, აქციები), „შესახებ“, „მეტი“ (აპლიკაციად დაყენება, გაზიარება, ცნობარი, საკუთარი ბოტის შექმნა), ენა (ქართული/English) და გასვლა. „მხარდაჭერა“, „საზოგადოება“ და „მეტი“ დაჭერაზე ადგილზევე იშლება. სხვა გვერდებზე (რეგისტრაცია, სიახლეები და ა.შ.) იმავე მენიუს მაშველი რგოლი 🛟 ხსნის — ქვედა მარჯვენა კუთხეში, არიციას გვერდით. სხვა ღილაკებს ნუ დაუწყებ ძებნას.
4. უბრალოდ დაწერე შეკითხვა — რეგისტრაციის გარეშეც გიპასუხებს. პასუხს იმ ენაზე მიიღებ, რომელზეც მიმართავ (ძირითადად ქართულად).

სტუმარი და რეგისტრაცია

დაურეგისტრირებლად (სტუმრად) ეკრანის კუთხეში გხვდება არიცია — გვერდის გიდი. დააჭირე და ალაპარაკდება; უნდა და წერილობითაც გესაუბრება. ის უპასუხებს კითხვებს პლატფორმაზე: რა არის ჭკუის კოლოფი, რა შეუძლია, რა ღირს, როგორ იწყება. ეს მისალმების საჩუქარია და ერთჯერადი — ერთხელ ივსება და აღარ ბრუნდება.

ექსპერტები — იურისტი, ექიმი, ფსიქოლოგი — სტუმარს არ ელაპარაკებიან: არიცია კონსულტაციას არ იძლევა და გემზე არავის სვამს. სტუმარს ასევე არ აქვს კარნახი, ფაილების ატვირთვა, კაბინეტი და შენახული ისტორია. რეგისტრაციისას სტუმრად დაწყებული საუბრები ავტომატურად ანგარიშს გადმოჰყვება და გრძელდება იქიდან, სადაც გაჩერდი.

რას გიხსნის რეგისტრაცია და ბალანსი:

• ხმოვანი რეჟიმი — ორივე სახით: კარნახი (მიკროფონი — ნათქვამი ტექსტად იქცევა) და ცოცხალი საუბარი (ყურმილის ღილაკი — ექსპერტი ხმით გპასუხობს, გაწყვეტინებაც შეიძლება);
• ფაილების და ფოტოების ატვირთვა;
• ჩატის ისტორია — გააგრძელე ზუსტად იქიდან, სადაც გაჩერდი;
• პირადი კაბინეტი: გრძელვადიანი მეხსიერება, პროფილური ფაილები, ადამიანების სივრცეები;
• საშუალო და ძლიერი სიმძლავრეები — გაცილებით ჭკვიანი პასუხები;
• გარანტიები: გაუხარჯავი თანხის დაბრუნება ნებისმიერ დროს.

რეგისტრაცია მარტივია: ელფოსტა → დადასტურება → ბალანსის შევსება შევსების გვერდიდან.

ოთხი ექსპერტი ერთ ჭერქვეშ

მასპინძელი

ზოგადი თანაშემწე და შენი გიდი პლატფორმაზე: ცხოვრებისეული კითხვები, ფაქტები, ინტერნეტ-ძიება, ვირტუალური კომპიუტერი საიტებზე სამუშაოდ. თემის მიხედვით თავად გადაგამისამართებს სწორ ექსპერტთან.

იურისტი

• ეყრდნობა ქართული სამართლის ცოცხალ ბაზებს — კანონმდებლობას და სასამართლო პრეცედენტებს — და პასუხს ამაგრებს კონკრეტული მუხლებით და პრაქტიკით.
• შეუძლია იურიდიული დოკუმენტების (სარჩელი, საჩივარი, ხელშეკრულება) შედგენა და სასამართლოს ფორმებთან მუშაობა.
• უკვე შევსებულ სასამართლოს ფორმაში ცალკეულ ველებს (საქმის ნომერი, მოსამართლე, თარიღი, ერთი-ორი პუნქტი) ასწორებს ისე, რომ მთელ ფორმას თავიდან აღარ ავსებს — ასე უფრო სწრაფი და იაფია.
• ღრმა იურიდიულ კვლევას ზოგჯერ რამდენიმე წუთი სჭირდება — ეს ხარისხის ნიშანია.

ექიმი — AI სამედიცინო კონსულტანტი

• ოჯახის ექიმის სტილით გამოგკითხავს, აგიხსნის სიმპტომებს, ანალიზებს და დიაგნოზებს, მოგამზადებს ექიმთან ვიზიტისთვის.
• აქვს პირადი სამედიცინო კაბინეტი: შენი ჯანმრთელობის ისტორია ინახება და ყოველ პასუხში გაითვალისწინება.
• საბოლოო დიაგნოზს არ სვამს და მკურნალობას არ ნიშნავს — საჭიროებისას ყოველთვის გირჩევს ცოცხალ ექიმთან ვიზიტს.

ფსიქოლოგი

სეანსური ფსიქოთერაპია — არა „კითხვა-პასუხი", არამედ ნამდვილი სეანსები. აღჭურვილია უნიკალური ქართული თერაპიული მეთოდით — ვიზუალთერაპიით, რომელსაც ანალოგი არ აქვს.

როგორ გადავერთო ექსპერტზე

• უბრალოდ სთხოვე ჩატშივე: „იურისტთან გადამიყვანე", „ფსიქოლოგი მინდა" — გადართვა მაშინვე მოხდება.
• თემას თუ შეცვლი, ექსპერტები თავადვე შემოგთავაზებენ სწორ კოლეგასთან გადასვლას.
• კაბინეტიდან „ოპერატორსაც" შეგიძლია სთხოვო, ჩაგსვას სასურველ ექსპერტთან.

სიმძლავრეები — იაფი, საშუალო, ძლიერი

პასუხის ხარისხს და ფასს განსაზღვრავს არჩეული სიმძლავრე:

ღილაკი: ჩატის ჩარჩოს ზემოთ, მარჯვნივ დგას „პასუხის სიმძლავრე“ — მინ / საშუალო / მაქს. დააჭირე სასურველს და შემდეგი პასუხი იმ სიმძლავრით მოვა.

გადართვა: ჩატშივე სთხოვე ექსპერტს — „გადართე ძლიერზე", „საშუალო მინდა", „იაფზე გადამიყვანე" — გადართვა მაშინვე სრულდება.

• თუ პასუხმა ვერ დაგაკმაყოფილა, სცადე ძლიერი სიმძლავრე — რთულ საკითხს ღრმა ანალიზი სჭირდება.
• თუ ბალანსის დაზოგვა გინდა, იმუშავე იაფზე და ძლიერი მხოლოდ საჭიროებისას ჩართე.
• სიმძლავრის არჩევა შეუძლიათ რეგისტრირებულ, ბალანსიან მომხმარებლებს.

ბალანსი, ფასები და გადახდა

რა ღირს

• სერვისი ფასიანია, დასაწყისი კი საჩუქარია: რეგისტრაციისას ბალანსზე $5 გერიცხება საჩუქრად. პირველი შევსება ხუთმაგდება — ჩარიცხე $10 და ბალანსზე $50 დაგხვდება; მეორეზე $20 → $50, მესამეზე $100 → $200 (თითო ერთხელ). საჩუქრის ამოწურვას ლოდინი არ სჭირდება.
• ფასი ნამდვილ პროფესიონალს შეადარე და არა ზოგად AI-ჩატბოტს: იურისტთან მიმართვა და სარჩელის დაწერა სულ ცოტა 1000 ლარი და ერთი თვეა, ჭკუის კოლოფში — დაახლოებით ერთი საათი და 100 ლარი, სასამართლოში კი გაგზავნის ღილაკით მიდის. მარტივი პასუხი რამდენიმე ცენტი ჯდება.
• ბალანსი $2-ს რომ ჩამოსცდეს, ელფოსტაზე გაფრთხილება მოგივა შევსების ბმულით და საიტზე ყვითელ ზოლს დაინახავ. $1-ს ქვემოთ „ბოლო" ზოლი ჩნდება — სერვისი არ ითიშება და სიმძლავრეც არ იცვლება, შენი არჩეული საფეხური რჩება. ნულზე ახალი კითხვა შევსებას დაელოდება. დაწყებული პასუხი შუაში არ წყდება — საჭიროებისას ბალანსი მინუსში ჩავა და სხვაობა შემდეგი შევსებიდან დაიფარება.
• ფასი დამოკიდებულია კითხვის სირთულეზე და არჩეულ სიმძლავრეზე: ძლიერი პასუხი მეტ ბალანსს ხარჯავს, იაფი — თითქმის არაფერს.

როგორ შევავსო ბალანსი

1. გახსენი შევსების გვერდი (კაბინეტიდანაც მიხვალ — „შევსება" ღილაკით).
2. აირჩიე შესავსები თანხა.
3. გადაიხადე ბარათით: საქართველოში გამოშვებული ბარათით გადახდა ლარშია, უცხოური ბარათით — დოლარში. PayPal-იც მიიღება (მინიმალური შევსება — 10 დოლარი).
4. თანხა მაშინვე აისახება ბალანსზე; ბალანსი კაბინეტში ჩანს.

ბალანსის ამოწურვისას ელფოსტაზე გაფრთხილება მოგივა „შევსება" ღილაკით — ერთი დაწკაპუნებით ხვდები შევსების გვერდზე.

ხმოვანი საუბარი და ფაილები

ორივე ფუნქცია ხელმისაწვდომია რეგისტრირებული, ბალანსიანი მომხმარებლებისთვის.

ხმოვანი შეტყობინება

• ჩატში დააჭირე მიკროფონის ღილაკს და ილაპარაკე — ნათქვამი ავტომატურად იქცევა ტექსტად და ემატება შენს შეტყობინებას.
• როცა ჩუმდები, ჩაწერა ცოტა ხანში თავისით სრულდება — ღილაკზე ხელახლა დაჭერა არ არის საჭირო.
• გაგზავნამდე ტექსტის შესწორება შეგიძლია.
• ხმით წერა კაბინეტშიც შეიძლება — იქ ერთი მცურავი მიკროფონია, რომელსაც სასურველ ჩარჩოსთან გადაათრევ; იხ. მცურავი მიკროფონი.

ფაილების და სურათების ატვირთვა

• ჩატშივე ატვირთე დოკუმენტი ან ფოტო (მაგ. ანალიზის ფურცელი, ხელშეკრულება, ცნობა) — ექსპერტი წაიკითხავს და პასუხში გაითვალისწინებს.
• დაფოტოგრაფებული საბუთებიც იკითხება — მკაფიო ფოტო საკმარისია.
• ფაილის ატვირთვა ცოცხალი ხმოვანი საუბრის დროსაც შეიძლება — ექსპერტი მას მომდევნო კითხვიდანვე ხედავს.
• თუ გინდა, რომ ატვირთული მასალა სამუდამოდ დამახსოვრდეს (მაგ. დიაგნოზები, ანალიზები), შეინახე კაბინეტის პროფილში — იხ. კაბინეტი.

პასუხზე პასუხი — ციტირება

• ყოველი პასუხის ქვეშ, კოპირების გვერდით, არის ისრიანი ღილაკი. დააჭირე და პასუხის დასაწყისი შენი შემდეგი შეტყობინების თავში ციტატად ჩაჯდება — ექსპერტი მიხვდება, რომელ ადგილს ეხები.
• უფრო ზუსტად: მონიშნე ტექსტის ნაწილი — მონიშნულის თავზე ორი ღილაკი ამოხტება, „ციტირება" და „კოპირება". პირველი მონიშნულს კითხვის ველზე მიაბამს, მეორე მხოლოდ იმ ნაწყვეტს გადაიტანს ბუფერში.
• ციტატა ველის თავზე ჩარჩოში ჩანს; ჯვარზე დაჭერით მოიხსნება. გაგზავნის შემდეგ ის შენივე შეტყობინებაში ცალკე ბლოკად რჩება — საუბრის ხელახლა კითხვისას გასაგებია, რას პასუხობდი.
• იგივე მუშაობს პარტნიორის ვიჯეტში. ტელეგრამსა და Messenger-ში ჩვეულებრივი „reply" გამოიყენე.

პასუხის ჩამოწერა — PDF ან Word

• როცა ექსპერტი დოკუმენტს შეგიდგენს (საპრეტენზიო წერილი, სარჩელი, განცხადება, ხელშეკრულების პროექტი, გეგმა, ვრცელი შეჯამება), სთხოვე „PDF-ად გამომიგზავნე" ან „ვორდში ჩამომიწერე" — ჩატშივე მიიღებ ჩამოსატვირთ ბმულს. ცალკე ღილაკი არ არის, უბრალოდ სთხოვე.
• PDF — მზა, დასაბეჭდი სახე (გაფორმება, ცხრილები, გვერდების ნომრები); Word — იგივე, ოღონდ რედაქტირებადი. გინდა ორივე — სთხოვე „ორივე ფორმატით".
• დოკუმენტი თვითკმარია: სათაური, მხარეები, თარიღი, სრული ტექსტი; ჩასასმელი ადგილები კვადრატულ ფრჩხილებშია მონიშნული. ბმული 7 დღე მოქმედებს, ფაილი შენს საბუთებშიც ინახება.
• ეს რეგისტრირებული მომხმარებლის შესაძლებლობაა.

ნახაზები — დიაგრამა და სქემა

• სთხოვე „დამიხატე", „გრაფიკად მაჩვენე" ან „სქემა გააკეთე" — სურათი იქვე, ჩატში გამოჩნდება.
• დიაგრამა ციფრებისთვის: შედარება, დინამიკა დროში, წილები მთელში (ხარჯები, ანალიზების ცვლილება, ბიუჯეტი). სქემა პროცესისთვის: ეტაპები, თანმიმდევრობა, სტრუქტურა.
• ექსპერტი თავადაც დახატავს, როცა ასე უკეთ ჩანს; ციფრებს ტექსტშიც გაგიმეორებს. სურათზე დაწკაპუნება სრულ ზომაში ხსნის.

კაბინეტი — შენი პირადი სივრცე

კაბინეტი აქვს მხოლოდ რეგისტრირებულ მომხმარებელს. აქ ინახება ყველაფერი, რაც პლატფორმას შენზე უნდა ახსოვდეს.

გრძელვადიანი მეხსიერება (პროფილი)

• თითო ექსპერტს თავისი პროფილი აქვს: რაც ექიმს უთხარი, მხოლოდ ექიმმა იცის, რაც იურისტს — მხოლოდ იურისტმა. პროფილი იმ დროს ივსება, როცა საუბარი დასრულდება — დაახლოებით ერთი საათის სიჩუმის შემდეგ, როცა რეპორტიც ფორმდება. საუბრის შუაში პროფილში არაფერი იწერება: თუ ექსპერტს სთხოვ „ჩაიწერე“, გიპასუხებს, რომ ჩანაწერი პროფილს საუბრის დასრულების შემდეგ დაემატება. პროფილის ნახვა და შესწორება კაბინეტშია — თითოეული ექსპერტის სივრცეში, „ჩემი“.
• როცა საუბარი სხვა ადამიანს ეხება, ექსპერტი მასზე მნიშვნელოვან ფაქტებს საუბრისას ინიშნავს; ჩანაწერი საუბრის დასრულებისას ამ ადამიანის საქაღალდეს ემატება, ცალკე ფასის გარეშე.
• წაკითხულ ფაილზე ექსპერტი ჩატში ჩანაწერს აკეთებს, რომ შემდეგ კითხვებზე ფაილის ხელახლა წაკითხვა არ დასჭირდეს.
• ექსპერტს შეუძლია შენი სხვა ჩატი გახსნას და წაიკითხოს, როცა შენი თხოვნა ამას მოიცავს.
• მეხსიერების ჩართვა/გამორთვა ნებისმიერ დროს შეგიძლია კაბინეტში ან „ოპერატორთან" ერთი თხოვნით.

პროფილური ფაილები

• ატვირთე ის ფაილები, რომლებიც ექსპერტს მუდმივად უნდა ახსოვდეს (მაგ. დიაგნოზები, ანალიზები, ხელშეკრულებები).
• ექსპერტი ამ ფაილებს მხოლოდ შენი ცალსახა თანხმობით კითხულობს — თანხმობას საუბარშივე გკითხავს.

ადამიანების სივრცეები

შეგიძლია ცალკე სივრცე გახსნა სხვა ადამიანისთვის (მაგ. „მამა") — მისი ისტორია და ფაილები შენსას არ აერევა. ყოველი სივრცე იმ ექსპერტის შიგნით იქმნება და ცხოვრობს, ვისთანაც გახსენი — საერთო თარო არ არსებობს: ექიმთან გახსნილი სივრცე მხოლოდ ექიმთან ჩანს და სხვა ექსპერტებთან არ გამოჩნდება. ეს სივრცეები ოთხივე ექსპერტს — ექიმს, იურისტს, ფსიქოლოგსა და მასპინძელს — ცალ-ცალკე აქვს: საუბრისას უბრალოდ უთხარი, ვისზეა საქმე, და ის თავად გახსნის ან გადაერთვება იმ ადამიანის საქაღალდეზე (მაგ. ექიმთან — ოჯახის წევრის ანამნეზი, იურისტთან — ცალკე კლიენტის საქმე).

მცურავი მიკროფონი — კაბინეტში ხმით წერა

კაბინეტში ბევრი ჩასაწერი ჩარჩოა (ისტორია, პროფილი, ჯანმრთელობის ბარათი…), ამიტომ მიკროფონი ერთია და მცურავი — გვერდით ბუშტი აწერია: „გადამიტანე ჩარჩოში და ჩამრთე".

• გადაათრიე მიკროფონი იმ ჩარჩოსთან, რომელშიც წერა გინდა — ჩარჩო მოინიშნება და მიკროფონი მას მიეკვრება.
• დააჭირე და ილაპარაკე; გაჩუმებისას ჩაწერა ცოტა ხანში თავისით სრულდება და ნათქვამი ტექსტად სწორედ იმ ჩარჩოში ემატება.
• ტექსტის შესწორება და „შენახვა" ღილაკზე დაჭერა შენზეა — ხმა მხოლოდ ტექსტს კრეფს, არაფერს ინახავს შენს ნაცვლად.
• ფასი იგივეა, რაც ჩატის ხმოვანი შეტყობინების.

ოპერატორი — კაბინეტის მორიგე

კაბინეტში გელოდება „ოპერატორი", რომელიც არა მარტო აგიხსნის — თვითონაც გააკეთებს:

• ჩართავს/გამორთავს მეხსიერებას;
• დაამატებს ადამიანის სივრცეს (ის იმ სპეციალისტის წიაღში იქმნება, რომელსაც მიუთითებ);
• ჩაწერს შენს პროფილში ან ადამიანის საქაღალდეში;
• გააგზავნის თანხის დაბრუნების მოთხოვნას;
• გამოიძახებს ცოცხალ დახმარებას — იგივეს, რასაც მენიუში „დაძაბვა“ აკეთებს;
• ჩაგსვამს სასურველ ექსპერტთან და გახსნის საჭირო განყოფილებას.

უბრალოდ მისწერე ადამიანურად: „ჩამირთე მეხსიერება", „დაამატე მამა", „ისტორია შემინახე".

„ოპერატორი" ჩვეულებრივი აგენტია: მისი საუბრები მემატიანეში ჩანს და იქიდან გაგრძელებაც შეიძლება; საჭიროებისას თავად გადაგიყვანს სასურველ ექსპერტთან. ყოველ პასუხს თავზე აწერია, ვინ და რა სიმძლავრეზე გპასუხობს.

ამის დიდი ნაწილი ახლა პირდაპირ ექსპერტის საუბარშიც შეგიძლია — „ოპერატორთან" ცალკე გადასვლის გარეშე. ნებისმიერ სპეციალისტს (ექიმი, იურისტი, ფსიქოლოგი, მასპინძელი) უბრალოდ სთხოვე: „ჩამირთე/გამირთე მეხსიერება", „ბალანსი რა მაქვს?", „თანხის დაბრუნება მინდა", „ცოცხალ დახმარებას დამაკავშირე" — თავად შეგისრულებს, საუბრიდან გაუსვლელად (თანხის დაბრუნებასა და ცოცხალ დახმარებას ჯერ დაგიდასტურებს).

დახმარება და ცოცხალი მხარდაჭერა

1. ჰკითხე პირდაპირ ექსპერტს ჩატში — პლატფორმის გამოყენების კითხვებზეც პასუხობენ.
2. კაბინეტის „ოპერატორი" — არა მარტო აგიხსნის, ბევრ რამეს თვითონვე გააკეთებს.

„დაძაბვა" — ცოცხალი ადამიანის დახმარება

„დაძაბვა“ ესკალაციას ნიშნავს — საუბარს ცოცხალ ადამიანს გადასცემ. თუ ხელოვნური ინტელექტი ვერ გართმევს თავს, რაღაც არ მოგწონს ან ცოცხალ ადამიანთან საუბარი გირჩევნია:

• სთხოვე კაბინეტის „ოპერატორს": „ცოცხალი დახმარება მინდა" — ის შენს შეტყობინებას მხარდაჭერის გუნდს გადასცემს;
• ან გახსენი მენიუ, ჩამოშალე „მხარდაჭერა“ და აირჩიე „დაძაბვა".

გუნდი ელფოსტით დაგიკავშირდება. ტექნიკური პრობლემის შეტყობინებაც (პასუხი არ მოდის, გადახდა არ გადის) იმავე გზით შეგიძლია — „ოპერატორთან" ერთი წინადადება საკმარისია.

თანხის დაბრუნება

• გაუხარჯავი ბალანსის დაბრუნება ნებისმიერ დროს შეგიძლია.
• თუ მომსახურება უხარისხო იყო, გაქვს უფლება მოითხოვო ტრანზაქციის სრული თანხის ანაზღაურება.
• მოთხოვნა: მისწერე კაბინეტის „ოპერატორს" — „ფულის დაბრუნება მინდა", თანხა და მიზეზი. ის თავად გააგზავნის მოთხოვნას ადმინისტრაციასთან.

ვერ იპოვე პასუხი? ნახე ხშირი კითხვები ან მოგვწერე: info@chkuiskolopi.ge