ყველა ციფრი ღიაა და გადამოწმებადი. მასალის გამოყენება თავისუფალია — წყაროდ „ჭკუის კოლოფის" მითითება საკმარისია.
ქართულმა AI-პლატფორმა „ჭკუის კოლოფმა" ღია გამოკითხვა ჩაატარა იმაზე, თუ რომელი საჭიროებით მიმართავენ ადამიანები ხელოვნურ ინტელექტს — ექიმი, ფსიქოლოგი, იურისტი თუ ყოველდღიური საქმე. პირველ ადგილზე ჯანმრთელობა გავიდა — 37%. ცალკე ყურადღებას იქცევს ისიც, რომ შეთავაზებას ყველაზე აქტიურად 65 წელს გადაცილებული აუდიტორია გამოეხმაურა.
საქართველოში AI-ის გამოყენება უკვე გაზომილია. ACT Research-ის 2025 წლის კვლევით (ონლაინ გამოკითხვა, 637 რესპონდენტი) მოსახლეობის 71% იყენებს AI-ხელსაწყოებს; ყველაზე აქტიურია 18–35 წლის ასაკი (94%), თბილისში გამოყენება უფრო მაღალია (79%), ვიდრე რეგიონებში (68%). მთავარი მიზნებია ინფორმაციის მოძიება (74%), სწავლა (52%), ზოგადი რჩევა (48%).
ჩვენი კითხვა სხვაა. ACTR-მა იკითხა, რა დავალებებს ასრულებენ AI-თი. ჩვენ ვიკითხეთ, რომელი საჭიროებით მიდიან — და აქ პირველ ადგილზე ჯანმრთელობა გავიდა. ორივე კვლევა თავსებადია და ერთმანეთს ავსებს: ერთი აღწერს, რას აკეთებენ, მეორე — რატომ.
ასაკზე ცალკე დათქმა. ჩვენ არ ვამბობთ, რომ ასაკოვანი ხალხი მეტად იყენებს AI-ს — ACTR-ის მიხედვით ახალგაზრდები წინ არიან და ჩვენ ამას არ ვეკამათებით. ჩვენი მონაცემი სხვა რამეზეა: ასაკოვანი ხალხი ჩვენს შეთავაზებას ბევრად უფრო აქტიურად გამოეხმაურა. სავარაუდო ახსნა ისიც შეიძლება იყოს, რომ ახალგაზრდებს AI უკვე აქვთ, უფროსი თაობა კი ახლა ეძებს.
„რისთვის იყენებ ხელოვნურ ინტელექტს?" — ჯანმრთელობა 37%, სულის მოთქმა 22%, ყოველდღიური საქმე 12%, უფლება და დოკუმენტი 7%, კოდი და ტექნიკა 7%. ჯანმრთელობა და სულის მოთქმა ერთად პასუხების 59%-ია.
Pew Research-ის 2026 წლის ივნისის კვლევით (3 488 გამოკითხული), ამერიკელების 34% იყენებს AI-ჩატბოტს ჯანმრთელობისთვის. ქართული მაჩვენებელი — 37% — სტატისტიკური ცდომილების ფარგლებში ემთხვევა.
სარეკლამო კამპანიაში ასაკად 18–50 იყო მითითებული, თუმცა ალგორითმმა მოცვის 69% დიაპაზონს გარეთ გაიტანა. გვერდის გახსნების 53% 65 წელს გადაცილებულებზე მოვიდა, 81% — 55 წელს ზემოთ. დამნახველთაგან გვერდი გახსნა 65+ ასაკის 3.5%-მა, 35–54 წლისების კი 1.5%-მა.
მოცვის 53% თბილისს გარეთ წავიდა: იმერეთი 13%, აჭარა 8%, სამეგრელო-ზემო სვანეთი 7%, შიდა ქართლი 7%, კახეთი 5%, ქვემო ქართლი 5%. კითხვა რაჭასა და ჯავახეთშიც მივიდა.
47 კომენტარიდან ოთხმა დაწერა, რომ რეგისტრაცია ვერ გაიარა. ერთი მათგანი ბოდიშსაც იხდიდა: „მაპატიეთ, რეგისტრაცია ვერ გავიარე — არ ცოდნის გამო."
47 თავისუფალ კომენტარში სიტყვა „მეგობარი" 12-ჯერ გვხვდება, სიტყვა „ხელსაწყო" ან „პროგრამა" — არცერთხელ. კომენტარების 85% დადებითია.
გამოკითხვა ღიად ჩატარდა 2026 წლის 21 აგვისტოდან 1 სექტემბრამდე მისამართზე chkuiskolopi.ge/gamokitkhva. მონაწილეობა რეგისტრაციის გარეშე იყო შესაძლებელი. დასრულებული პასუხების რაოდენობა — 343, ცდომილების ზღვარი ±5.3% 95%-იანი სანდოობით. ქვეყანა ინტერნეტ-მისამართით დგინდებოდა: 336 პასუხი საქართველოდან, 7 — დიასპორიდან.
ორმაგ ხმას ორი ფენა იცავდა: ბრაუზერის უნიკალური გასაღები და ერთი მისამართიდან დღიური ჭერი. აუდიტორია მოზიდულია ქართულენოვანი ფეისბუქის სარეკლამო კამპანიით (ბიუჯეტი $68.96), ამიტომ შერჩევა მოსახლეობის შემთხვევითი ამონარჩევი არ არის და შედეგები ამ არხის აუდიტორიას აღწერს.
ასაკობრივი და რეგიონული მონაცემები სარეკლამო კაბინეტიდანაა და აღწერს რეკლამის აუდიტორიას, არა თვითონ რესპონდენტებს — გამოკითხვაში ასაკს არ ვეკითხებოდით.
„ჭკუის კოლოფი" (შპს „პარალიგალ ეიაი", ს/კ 404775720) ქართულენოვანი მულტიფუნქციური AI-პლატფორმაა. პირველი მომხმარებელი 2024 წლის 8 ნოემბერს შემოვიდა. პლატფორმაზე ხუთი სპეციალიზებული აგენტი მუშაობს — იურისტი, ექიმი, ფსიქოლოგი, დეველოპერი და მორიგე — ქართულ ენაზე.
იურისტი 34 000-ზე მეტ საკანონმდებლო აქტსა და 10 000-ზე მეტ სასამართლო გადაწყვეტილებას ეყრდნობა. პლატფორმას 11 700-ზე მეტი მომხმარებელი აქვს. 2026 წლის ოქტომბერში კომპანია საქართველოს ინოვაციების სააგენტოს (GITA) შერჩევით მონაწილეობს სინგაპურის SWITCH-ის ფორუმზე.
შპს „პარალიგალ ეიაი"
ინოვაციების ქუჩა 7, ოქროყანა, თბილისი 0114
ფოსტა: info@chkuiskolopi.ge
ვებგვერდი: chkuiskolopi.ge
დამატებითი ჭრილი, ცალკეული ციფრი ან ინტერვიუ — მოგვწერეთ და გამოგიგზავნით.
ჭკუის კოლოფი — პირველი ქართული მულტიფუნქციური AI პლატფორმა
